Geh, stöh nu oas uma!

☜zruck zum Språchkuas ☚
☜zruck zum index☚

Geh, stöh nu oas uma! -- oda: Ode aun's wiatshaus...

I woaß schon, so romantisch wia se des då unt auhead, woas ament a nia...
aloa scho weu de leid --samma uns eali: d'maunsbüda-- zeast z'laung im wiatshaus gsessn, und daun meist ned netta vüh z'spåd, sundan a vüh z'bsoffm hoamkema han.

Åwa, heizatåg, wo oi netta nu moanan, de gastronomie warad, wia da naum scho sågt, oinzeg und aloa fia's bäuchi då, und ma gang zum Griachn, Inda, Italjena, Japana, Kinesn, Koreana, Kurdn oda in a feins restarau --in iagnd so a nowi-hittn hoid-- oda ebm zum wiat, damid ma wås fia'n gaumen oda fia'n mågn --oda fia boade-- tad...

... dena leid muaß ma do amoi drau arinnan --ned netta de zuagroastn, sundan a de dåsign--, das's a a zeid gebm håd, wost zum wiat gaungan bist, weus duat zaumma-ghuckt han. Weus duat midanaund gredt håm und midanaund redn håm kina... ... a waun da ned oiweu gscheid und a ned oiweu sche gredt wuan is...

Und gråd heid soi ma des woi sågn deafm, wo si de gsezgewa --de nazionaln grådso wia de iwa-nazionaln - und mittlaweul a de Herrn Ärzte und de Damen Doktoran -- goa so a große mia au-dan --mid am raucha-gsetz und ålle meglichn auflågn und gleichschoitunga greiz und gwea duachan eiropäischn gmias- und fleisch- und bia-goatn-- das ma boid nimma drau denga miassn, wås des eigentli woa, wås des eigentli ghoaßn håd: "'s wiartshaus".

Und damidst --im sinne vo ana üwa(-regionaln)-gleichbehaundlung-- a in rua vagessn kaust, vo wo 's wirtshaus kimmt, und obs jemois sowås wiara kuiturgeschichte vom "wiatshaus" gebm håd oda gebm häd kina ...

Åwa um's wiatshaus söwa geht's jå eh scho laung neamt mea.

Heit geht's jå netta nu um d'"Gastronomie", um ålle oat vo ausspeis, vo "Nårungs-Ausgåwe-Stöhln", ob des jetz des laumm-kebap-standl aun da kiacha, des schweins-schnitzl-standl aun da moschee, a gurmöh-tömpi fia de großkopfadn, oda sunst a åb-speis is.

Und då --find i-- deaf ma do a awöngi romantisian und de såch sche-redn, fiara so a austeawade instituzijaun.

Daweu kannt ma jå, waun ma genau hischaugn, woi z'recht sågn, das a wiatshaus ois aundre ois a ausspeis is, weu:

Geh, stöh nu oas uma! -- oda: Ode an das Wirtshaus...

Jå wea ins Wiatshaus geht, der geht ned essn,
wea ins Wiatshaus geht, der geht zum wirt
weu in am Wiatshaus wiad ned gessn, sundan gsessn,
wiad a beim wiat vom wiat a essn moi serviert.

jå in am wiatshaus, då wird gschdridn, grafft und gredt
ob da wås aussa kimmt dabei, odara ned,
und head ma maunchs a duat, wo ma se hoib vaschluckt
--und fåst ins glasl spuckt --
es wird beim wiatn oiweu wieda zaumma-ghuckt.

Jå wea ins Wiatshaus geht, der geht ned essn,
wea ins Wiatshaus geht, der geht zum wirt
weu in am Wiatshaus wiad ned gessn, sundan gsessn,
wiad a beim wiat vom wiat a essn moi serviert.

Jå in am wiatshaus wiad ned gsoffm sondan zua-prost
woas ament vileicht a 's oane glasl z'vüh
då kriagst koan sauwinjo , kriagst bia und wei und most
odara schnapsl nu, fia oan, der nu oas wüh

Jå wea ins Wiatshaus geht, der geht ned essn,
wea ins Wiatshaus geht, der geht zum wirt
weu in am Wiatshaus wiad ned gessn, sundan gsessn,
wiad a beim wiat vom wiat a essn moi serviert.

wås håmma heid gleand:

Ma soi ned glaubm, wås im wiatshaus so umagredt wiad.
Das a echts wiatshaus eha zum "immateriellen Kulturerbe" vo da UNESCO, ois zua Rauchvabots-Zone vo da EU gheat.
Das de meran leid, de zum wiatn gengan, auf såchan alergisch san, de auf koana alagen-koatn ausgwiesn hant.
Das de kuiturgeschichte vom wiatshaus endli amoi aufgoawadt ghearad.